तळोजा पोलीसांनी अवघ्या ४ तासात ४ वर्ष ११ महिन्याच्या अल्पवयीन अपहृत मुलीचा घेतला शोध; नराधमाच्या आवळल्या मुसक्या…… 

🔊 Listen to this

तळोजा पोलीसांनी अवघ्या ४ तासात ४ वर्ष ११ महिन्याच्या अल्पवयीन अपहृत मुलीचा घेतला शोध; नराधमाच्या आवळल्या मुसक्या……
पनवेल(संजय कदम ): तळोजा पोलीसांनी अवघ्या ४ तासात ४ वर्षीय ११ महिन्याच्या अपहृत मुलीचा शोध घेतला असून या सदर मुलीचे अपहरण करणाऱ्या नराधमाच्या स्थानिक नागरिकांच्या मदतीने शोध घेऊन काही तासातच त्याच्या मुसक्या आवळण्यात यश आले आहे.
तळोजा परिसरातील फेज १, यांनी तक्रार देताना सांगितले की, त्यांच्या ४ वर्षीय वर्षीय ११ महिन्याच्या अल्पवयीन मुलीस तेथील गॅरेज मध्ये काम करणाऱ्या प्रमोद राम बहाद्दूर महतो (वय ३०) याने अपहरण करून तो पसार झाला आहे.गुन्ह्याचे गांभीर्य लक्षात घेऊन पोलीस उप आयुक्त, परिमंडळ-२ पनवेल पंकज डहाणे, सहाय्यक पोलीस आयुक्त पनवेल विभाग,भागवत सोनवणे यांना तळोजा पोलीस ठाण्याचे वरिष्ठ पोलीस निरीक्षक जितेंद्र सोनवणे यांनी माहिती दिली व त्यांच्या मार्गदर्शनानुसार सदर इसमा विरोधात गुन्हा नोंद करून पोलीस अधिकारी यांच्या अधिपत्याखाली वेगवेगळया ४ टिम तयार करून घटनास्थळ तसेच परिसरातील सीसीटीव्ही तपासणे, मोकळी मैदाने तपासणे, निर्जन स्थळ तपासणे, तांत्रीक तपास करणेबाबत सुचना दिल्या व शोध चालू केला. त्यावेळी आरोपी हा त्याची स्कुटी नंबर १९८० यावरून अल्पवयीन मुलीस घेवून गेल्याचे निष्पन्न झाल्याने सदर स्कुटीचा सुध्दा शोध घेण्यास सर्व टिमला सुचना दिल्या. अपहृत मुलीचा शोध घेत असताना आरोपीची स्कुटी नं एमएच ४६ बीसी १९८० ही भुयारी मार्गाच्या जवळील मेट्रो ब्रिज येथे मिळून आली. त्यानंतर मेट्रो ब्रिजचे खालील ओसाड व रानटी वाढलेल्या गवतामध्ये अंधारामध्ये शोध घेण्यासाठी पोलीस टिम तसेच पोलीस ठाणेकडील जास्तीत जास्त पोलीस अंमलदार बोलावुन घेतले तसेच स्थानिक समाजसेवेचे काम करणारे नितेश पाटील, पनवेल महापालिकेचे माजी नगरसेवक हरेश केणी व कासम मुलानी यांचे व त्यांचे सोबतचे इतर नागरीकांच्या मदतीने बॅटरीचे सहाय्याने तसेच नवी मुंबई पोलीस आयुक्तालयाकडील व आर.ए.एफ बटालियन कडील डॉगस्कॉडव्दारे पाहणी करून शोध चालू केला. या गुन्ह्यातील आरोपीने सदर ठिकाणी पोलीस व नागरीक कसुन तत्परतेने पाहणी करीत असल्याचे पाहून सदर अल्पवयीन मुलीस कोणतीही इजा न पोहचविता घाबरून सदर अपहृत मुलीस मेट्रो ब्रिजचे खाली अंधारात सोडुन पोबारा केला. अपहृत मुलगी मेट्रो ब्रिजचे खाली सुखरूप मिळुन आली असुन तिला तिच्या पालकांकडे सोपविण्यात आले आहे. सदर प्रकाराबाबत तळोजा परिसरात पालकांमध्ये भीतीचे वातावरण निर्माण झाल्याने आरोपीत इसमाचा लवकरात लवकर शोध घेवुन त्यास जेरबंद करून लोकांमध्ये पोलीसांविषयी विश्वास निर्माण करण्याचे आव्हान तळोजा पोलीसांपुढे उभे होते. वरीष्ठांनी दिलेल्या सुचनांप्रमाणे आरोपीचा शोध चालु असतांना, आरोपीत इसम हा तळोजा फेज १ भागात दिसुन आल्याची गोपनिय खबर प्राप्त झाल्याने गुन्हेप्रकटीकरण पथकाने सापळा लावुन १० तासांचे आत त्याचा शोध घेवून आज पहाटे अटक केली आहे. या कामगिरीसाठी वरिष्ठ पोलीस निरीक्षक जितेंद्र सोनवणे, सपोनि सुनिल गुरव, सपोनि सतिष गोरे, मसपोनि विनया पारासुर, पोउपनि अनंत लांब, पोउपनि बळीराम घंटे, पोउपनि सुनिल होलार, पोउपनि प्रतापसिंह चव्हाण, तसेच पोलीस ठाणेकडील सर्व पोलीस अंमलदार, नवी मुंबई पोलीस आयुक्तालयाकडील डॉग स्कॉड व आरएएफ कडील डॉग स्कॉड यांनी विशेष मेहनत घेतली याबद्दल स्थानिक ग्रामस्थ व पोलीस अधिकाऱ्यांचे कर्मचाऱ्यांचे परी मंडळ २ चे उपयुक्त पंकज डहाणे यांनी कौतुक करून त्यांना सन्मानपत्र दिले.