पुणे येथील ‘खडकवासला जलाशय रक्षण’ अभियान 20 व्या वर्षीही 100 टक्के यशस्वी ! मानवी साखळीद्वारे प्रबोधन करून रोखले खडकवासला जलाशयाचे प्रदूषण….
या वेळी उपस्थित मान्यवरांनी समितीच्या कार्याला पाठिंबा दर्शवला आणि या अविरत कार्याचे कौतुक केले. हिंदु जनजागृती समिती मागील 19 वर्षे हा उपक्रम राबवत आहे. हे सातत्य वाखाणण्याजोगे आहे. संपूर्ण दिवसभर जलाशयाचे रक्षण करणे हे सामाजिक बांधिलकीचे काम ही संस्था करत आहे. यात लहान मुले, ज्येष्ठ नागरिक आणि महिला कार्यकर्ते उत्साहाने सहभागी होऊन सर्वाना शिस्त लावण्याचे कार्य करत आहेत असे म्हणून उपस्थित मान्यवरांनी समितीच्या कार्याचे कौतुक केले. खडकवासला मतदारसंघाचे आमदार भीमराव तापकिर, खडकवासला पाटबंधारे विभागाचे उपविभागीय अभियंता पोपटराव शेलार, खडकवासला पाटबंधारे विभागाचे शाखा अभियंता राजेंद्र राऊत आणि दत्तात्रय कापसे, पुणे मनपाचे माजी नगरसेवक बाळासाहेब नवले, गोर्हे ग्रामपंचायत सदस्य बाबा खिरीड, साहाय्यक पोलीस निरीक्षक निरंजन रणवरे आणि ग्रामस्थ यांनीही अभियान स्थळी भेट दिली. प्रबोधनानंतर अनेक नागरिकांनी अभियानाचे विशेष कौतुक केले.
प्रबोधनात्मक फलक हातात धरून सकाळी 9 पासून सायंकाळी 7 पर्यंत जलाशयाच्या भोवती मानवी साखळी करून अभियान राबवण्यात आले. या अभियानाला पोलीस–प्रशासनाचेही उत्तम सहकार्य लाभले. सर्वांच्या सहकार्याने अभियानाला व्यापक स्वरूप प्राप्त झाले. अशाच प्रकारे रंगपंचमीच्या दिवशी म्हणजे 22 मार्चलाही हे अभियान राबविण्यात येणार आहे.